TACLOBAN CITY – Mahitungod han nagtitikahitaas nga kaso han COVID-19 ha syudad han Tacloban in nagpagawas hin Executive Order an alkalde han syudad may paghisumpay ha pagpapahugot han ginpapatuman nga quarantine measures.
Sumala kan Atty. Aldrin Quebec, Tacloban City Administrator, an mao nga EO in base ha rekomendasyon han City Health Office ngan iba pa nga miyembro han Task Force against COVID-19 ha syudad.
Kasagaran ha mga aludayday nga ginpalusad in naeksister na nga daan pinaagi han nagpapadayon nga modified general community quarantine (MGCQ) pero an naidugang la hini an pagregulisa o pagdidire han social gatherings o bisan ano nga klase hin katitirok ngan sugadman an pag-implementar han liquor ban.
Nahimugso an mao nga pitad mahitungod nga nakikita ha pagkayana nga an transmission han COVID-19 ha syudad in tikang ha mga katitirok labi na nga an bag-o nga mga kaso hini in magpaparyente o magsarangkay la.
Kasagaran manggud nga nananabo in namamatagya la an mga magpapamilya o magsarangkay ha kada mga katitirok ngan dire nagsusunod ha sakto nga health protocols.
Samtang, yana nga adlaw kaparte gihapon han operasyon han City Government an paglibot ha mga establishmento nga apektado han ginpalusad nga EO agud nga matagaan hin kaangayan nga notisya o impormasyon.
