Gin hangyo han negosyante nga hi Charlie ‘Atong’ Ang pinaagi han iya abogado nga hi Atty. Gabriel Villareal ha Department of Justice nga dire na hiya iglakip kumo ‘respondent’ ha kaso han pag-‘kidnap’ ha pira nga sabungero ha Manila Arena.
Gintagan-duon gihapon ni Atty. Villareal nga waray hibruan hi Atong Ang ha nahitabo nga pagkawara han mga sabungero ha partikular na an kaso nga aadto ha Manila Regional Trial Court.
Utro manggud nga gin abrihan han Justice Department an preliminary investigation kun diin igindabi ni Julie ‘Dondon’ Patidongan hi Ang kumo ‘mastermind’ ha kaso.
Sanglit, iginkapausa ni Atty. Gabriel Villareal an utro nga pag-aabri han kaso han buhatan nga baga hin napabor kan Patidongan ha ilarom han Witness Protection Program.
Sumala ha abogado, subay an ira iginsumite nga hangyo ha prosekusyon ha nahitabo nga ‘recantation’ ni Julie Patidongan ha iya pahayag nga nagyayakan nga waray ini hibabruan ha nahitabo nga pagdukot ha unom nga nawawara nga sabungero.
Gin bawi hini an iya affidavit samtang gintudlok hini kumo mastermind ni Atong Ang ha nasabi nga kaso.
Mahuman an gindumara nga preliminary investigation, ginlalauman nga reresolbahon na ini han prosekusyon o magigin ‘submitted for resolution’ na an ‘kidnapping and serious illegal detention cases’.
Dinhi in tutudlukon kun angay ba iglakip kumo akusado hi Atong Ang ha ginhe-hearing na nga kaso ha Manila regional Trial Court.
