Nakakuha hin duro nga batikos ngan gin akusaran hin animal cruelty an usa nga arcade ha Shenzhen, China, mahuman hini himuon nga presyo an mga buhi nga hamster ha usa nira nga claw machine game.
Nagsarang ha social media an mga makaluluoy nga litrato nga kuha ha Yuekong City arcade kun diin makikita an mga gudti nga hamster nga nagsusuruksok ha usa nga piliw han makina. Labot ha nakaka-bungol nga kaaringasa ngan nakakasilaw nga suga han arcade, napiritan gihapon an mga hayop nga dalaganan ngan likayan an claw kada mayda magpu-prubar nga dakpon hira.
Sumala ha eksperto, duro ka-sensitibo an mga hamster ha aringasa ngan kahuot, sanglit an mga sugad nga kondisyon in nagdudurot ha ira hin duro nga stress ngan kahadlok.
Gin prubaran han pira nga bisita nga ig-report an insidente ha pulisya, pero pakyas an mga ini mahitungod nga waray ginpapatuman nga balaod para ha animal welfare ha nasabi nga syudad.
Sugadpaman, mahuman nga mag-viral ngan makakuha hin kasina ha publiko an isyu, gintanggal han arcade an nasabi nga claw machine. An ginsaliwan han mga ini, duh nga bag-o nga makina kun diin buhi nga isda ngan gudti nga ba-o naman an papremyo.
Sumala ha isa nga empleyado, gintanggal an mga hamster dire mahitungod ha kaluoy ha hayop, kundi mahitungod nga posible hira kasuhan ha ppagtalapas ha disease control and prevention laws mahitungod nga waray hira kaangayan nga lisensya agud gumamit han nasabi nga hayop ha sulod han establisyemento.
Ha presente, wwaray la gihapon national law an China nga nagpoproteher ha mga gudti nga hayop ngan pets tikang ha pan-aabuso.
