Ginbuhi utro han administrasyon an pagduduso ha kontrobersyal nga Anti-Political Dynasty Act ngan an reporma ha Party-list system mahuman ini ig upod ha listahan han mga prayoridad nga balaudnon yana nga tuig.
Subay ha datos han Department of Economy, Planning and Development (DEPDev), kaupod an mga nahingadayan nga reporma ha pulitika ha 21 nga panukala nga gin aprubahan han Legislative-Executive Development Advisory Council (LEDAC).
Labot ha mga pagbabag-o ha sistema han pulitika, gintagan-duon an panginahanglan nga maisalawad an Anti-Fake News and Digital Disinformation Act.
Target han balaod nga masirotan an mga indibidwal nga ada ha luyo han pagsasarang ha malisyoso ngan sayop nga impormasyon nga iginkokonsidera nga hulga ha nasyunal nga seguridad.
Samtang, maupay nga sumat naman para ha mga biyahero an iginduduso nga pagbungkag o abolition han travel tax.
Kaupod gihapon ha mga ginkasabutan nga listahan an pagdelatar ha pinakasyahan nga Parliamentary Elections ha BARMM.
Nasulod gihapon ha prayoridad an pag-amyenda ha mga balaod nga maprotekta ha mga kabataan, partikular an Anti-Online Sexual Abuse or Exploitation of Children (OSEAC), ngan Anti-Child Sexual Abuse or Exploitation Materials (CSAEM) Act.
Subay ha DEPDev, an mga pitad in importante agud maibalik an pagtapod han publiko ngan masuportahan an mga polisiya han presente nga administrasyon.
