TACLOBAN CITY – Iginpahayag han alkalde han syudad han Baybay nga retrieval operation nala an gindudumara ha pira nga mga barangay ha ira lugar kundiin nagkaada hin landslides tungod han epekto han Bagyong Agaton.
Sumala kan Mayor Carlos Cari ng Baybay City, padayon an retrieval operation ha Brgy. Bunga ngan Kan-Ipa kun diin halos matabunan an mga ini han landslides.
Ha pagkayana in maabot na ha 37 an ihap han mga casualties ha Baybay City, kaupod na an usa nga biktima han landslide nga nag-angkon hin head injury nga daw in namatay naman ha ospital.
Igpapadayon yana an search and rescue operations ha Brgy. Kantagnos kun diin ginlalauman nga mayda pa mga survivors.
Aminado an alkalde nga pakuriay an ira ginbubuhat nga operasyon tungod ha padayon nga pag-inuran ngan delikado an pagsakob o pagkadto ha mao nga mga barangay kun diin natabo an mga landslides.
Padayon gihapon an ira ginbubuhat nga head count ha ira lugar agud nga matudlok kun pira pa an mga missing nga biktima.
Ha pagkayana in ginpailarom na ha state of calamity an bug-os nga syudad han Baybay.
Pira nga mga survivors in nagpapabilin ha mga ospital samtang an iba naman in aadto ha mga evacuation centers.
Sumala kan Mayor Cari, posible nga maihaan pa an pagpapabilin han mga biktima ha evacuation centers tungod nga kadam-an ha mga ini an nagkawawarayan hin panimalay tungod han landslides.
