TACLOBAN CITY– Gin-anunsyo han Holy See Press Office nga pagdudumaraon an Misa Pro Eligendo Romano Pontifice o Misa para ha pagpili hiton bag-o nga Santo Papa ha Miyerkules, Mayo 7, 2025 alas-10 hiton aga (alas-4 naman hiton kulop oras ha Pilipinas) ha St. Peter’s Basilica, nga papangunahan ni Cardinal Giovanni Battista Re, Dean of the College of Cardinals.
Samtang ha adlaw naman hiton Lunes Mayo 5, alas 11:30 hiton gab-i oras ha Pilipinas, pagdudumaraon an panunumpa han opisyal nga tinaglawas han Conclave ha Pauline Chapel han Vatican Apostolic Palace, kalakip naman ha manunumpa an mga kapadian,, madre, doktor, guwardiya, ngan iba pa nga mga tinaglawas ha mao nga lugar.
Pormal nga magtitikang an Conclave ha Miyerkules, Mayo 7, kun diin an mga Cardinal Electors in masulod ha Sistine Chapel agud nga tikangan an proseso han pagbotos para hiton masunod nga Santo Papa.
An mga Cardinal in magsusul-ot hin tradisyunal nga bado ngan maagi ha espiritwal nga prusisyon pakadto ha Sistine Chapel samtang nakanta an mga ine hin Veni Creator Spiritus.
