Nagpagawas hin panibag-o nga evacuation orders an Israel para ha pira nga bungto ha southern Lebanon dida han Dominggo, kasunod han pagkamatay han pira nga sundalo ngan padayon nga kasamok ha butnga han Israeli forces ngan grupo nga Hezbollah.
Subay ha Israeli military, gin abisuhan an mga residente ha pito nga bungto nga magbakwit tikadto ha hilaga ngan kanluran, lahos ha gintatawag nga “buffer zone” nga kontrolado han Israel ugsa an ceasefire.
Ginmalatumat gihapon han Israel nga nagdumara hira hin mga airstrike kontra ha Hezbollah, rocket launchers, ngan usa nga weapons depot.
Iginduon ni Israeli Prime Minister Benjamin Netanyahu, nga an pangunahon nga panuyo nira an seguridad, ira mga sundalo, ngan mga kumunidad ha nasud.
Samtang, nagbaton naman an Hezbollah ngan ginmalatumat ngan dire hira maundang ha pag-atake samtang nagpapadayon an pagtalapas han Israel ha ceasefire. Subay ha grupo, dire hira malaum ha diplomasiya nga waray magin epektibo.
Syahan hini, gin amin han Hezbollah nga gin atake nira an Israeli troops ha sulod han Lebanon, kaupod an rescue team nga naresponde. Gin kumpirma naman han Israeli military nga usa nga sundalo an namatay ngan unom an samaran ha insidente.
Nahipatik gihapon han Israel nga nabalabgan hini an tulo nga drone ugsa paman makasulod ha ira teritoryo.
An ceasefire nga ginpangunahan han Estados Unidos, nga tikang dida han Abril 16 ngan ginpahilawaig kutob ha kabutngaan han Mayo, in nagdurot hin temporaryo nga pag-iiban han karahasan. Sugadman, padayon an balyuay han buto ha magkaluyo nga parte nga parehas nagbabasulay ha pagtalapas han kasabutan.
Subay ha Lebanon health ministry, sobra 2,500 katawo na an namatay ha mga pag-atake han Israel tikang han magtikang utro an kasamok dida han Marso 2, kaupod an mga sibilyan sugad han kababayen-an, kabataan, ngan mga medical workers.
ha parte naman han Israel, duha nga sibilyan an nahipatik nga namatay mahitungod ha mga pag-atake han Hezbollah, samtang 16 nga sundalo naman an napatay han Lebanon tikang han magtikang an kasamok.
