PALO, LEYTE – Agud mapadali an pagbabasa han mga medical results han mga pasyente, an Automated Intelligence o AI in gagamiton ha Quick Medical Records (QMeR) kumo giya ha mas madali nga pag access ha mga abilabli nga healthcare services han mga pasyente.
Sumala kan Leyte Province Governor Jericho Petilla, ini in usa nga electronic version han mga impormasyon han pasyente nga may panuyuan nga mas mapadali an pag kita han mga Doctor ha medical history han pasyente ug mas ma monitor an kalusugan han pasyente bisan hain man ini pumakadto nga hospital o rural health center pag pa check up sugad man pinaagi han Artificial Intelligence, in bisan man kun waray abilabli nga Doctor, in masasabtan han pasyente kun ano an resulta han iya medical tests.
Gin tagan duon naman ni Gov. Petilla nga an AI interpretation in diri opisyal nga resulta kundi usa la ini nga alternatibo nga inyerpretasyon nga puydi magamit kun waray abilabli nga medical expert ha usa nga lugar.
Subay kan Petilla, usa ha mga pitad nga gin hihimo han probinsya agud mas mapaupay pa an serbisyo han QMeR in an paghihimugso han Quick Medical Record and Referral System kun diin, an usa nga hospital in magrerefer hin pasyente electronically sugad man diri na an mga pasyente mag huhulat ha emergency room ngan dayon na ini nga ig co-confine mahitungod nga ini in tapos na ka check han hospital nga nag refer.
Dugang pa hini, tanan nga mga impormasyon nga kapot han hospital nga nag refer han pasyente sugad han mga test results in abilabli ha sakob han QMeR agud mas mapadali an proseso ha pag tambal han pasyente. (via Bombo Niña Magpili)
