-- Advertisements --

SAN MIGUEL, LEYTE — Nakakarawat hin tulo nga pagkilala an lokal nga pangobyernuhan han San Miguel, Leyte, ha gindumara nga RAYHAK 2026 han Department of the Interior and Local Government (DILG), tungod han maupay nga pagpatuman han mga programa ngan episyente nga paghatag hin serbisyo publiko.

Sumala kan Municipal Mayor Atty. Norman Sabdao, an RAYHAK 2026 in usa nga programa han DILG nga may panuyo nga maghatag hin pagkilala ha mga bungto, syudad, probinsya ngan mga regional office nga nagpapakita hin episyente nga pagpatuman han ira mga mandato ngan paghatag han ginkikinahanglan nga serbisyo ha katawhan.

Dugang pa han alkalde, usa ha mga ginkokonsidera ha paghatag han mga award amo an pagpatuman hin participatory governance, transparency ngan accountability ha pagdumara han pangobyernuhan, nga padayon nga ginduduso han bungto han San Miguel.

Samtang, ika-upat na ini katuig nga ginkikilala an San Miguel komo Good Local Governance, samtang ikapito na ka tuig naman nga ginkikilala an bungto pinaagi han Seal of Good Financial Housekeeping. Dugang pa ni Sabdao, ginkilala gihapon an LGU han San Miguel nga highly functional ha pagpatuman han mga programa may kalabotan ha peace and order ngan drug abuse prevention.

Ha kabug-osan, tulo nga award an nakarawat han San Miguel durante han RAYHAK 2026, nga sumala ha alkalde nagpapakita han padayon nga paningkamot han lokal nga pangobyernuhan ha pagpauswag han serbisyo publiko.