EASTERN SAMAR — Nagpapabilin ha P16 kada kilowatt hour an power rate han Eastern Samar Electric Cooperative (ESAMELCO) dida han Oktubre, tikang ha P14 dida han naglabay nga mga bulan, tungod han Line Loss Congestion Cost (LLCC).
Sumala kan ESAMELCO General Manager Atty. Edwin Amancio, nagkamay-ada hin dako nga paghitaas han LLCC dida han Hulyo ngan Agosto nga umabot ha P18 tubtob P20 kada kilowatt hour, pero waray ini igdugang ha power rate han mga konsumidor durante hini nga mga bulan.
Ginpahayag ni Amancio nga nagpagawas an Energy Regulatory Commission (ERC) hin resolusyon may kalabotan ha LLCC, kun diin an iba nga charges in gin-recalculate, pero mayda pa gihapon nabilin nga charges o baraydan. Tungod hini, naghangyo an ESAMELCO ha ERC ngan ha Independent Electricity Market Operator of the Philippines (IEMOP) nga tugotan hira nga baydan an nabilin nga charges pinaagi hin installment.
Sumala ha iya, ginbahin-bahin an pagbayad hini ha magkadurudilain nga bulan, sanglit may dugang nga kantidad nga kinahanglan iglakip ha power rate yana nga bulan.
Basar ha datos nga iginpaangbit han ESAMELCO, nagtikang ha P15 kada kilowatt hour an power rate dida han Hulyo, nag-ubos ha P14 dida han Agosto, ngan humitaas naman ha P16 dida han Septyembre tubtob Oktubre.
