TACLOBAN CITY – Siyam nga mga kapulisan ha Sinirangan Bisayas iton gintagan hin pagkilala kadungan ha selebrasyon han 33rd PNP Foundation Day ha Camp Ruperto Kangleon, Palo, Leyte dida han Pebrero 12.
Ha seremonya nga ginpangunahan hiton regional director han Police Regional Office 8 nga Brig. Gen. Reynaldo Pawid kaupod hi Tacloban City Mayor Alfred Romualdez, gintagan hin PNP Merit Medal o Medalya ng Kagalingan hira Lt. Col. Aquilino Pongcol III hiton Samar Police Provincial Office; PMaj Floranda Relente ngan PCpl Clifford Von Limosnero han Leyte Police Provincial Office; PCapt Lorben Deraco ngan PMSg Reggie F Diola han Regional Police Drug Enforcement Unit 8; PCapt Omar Roel Cartalla ngan PSSg Henry Hermoso hiton Ormoc City Police Office sugad man hira PSSg Jocriz F Briones ngan PSSg Marc Evanz Cezar Latoza han Tacloban City Police Office.
Hi Lt. Col. Pongcol in ginpasidunggan tungod han malinampuson nga buybust operations ha Brgy. West Awang, Calbayog City, Samar dida han nakalabay nga Disyembre 7, 2023 kon diin nagresulta ini hin pagkarekober hin balor Php468,560 nga kantidad hin shabu.
Hi PMaj Florando Relente ngan PCpl Clifford Von Limosnero in ginkilala tungod gihapon hiton malinampuson nga anti illegal drug operation kon diin naaresto hi Joselito Panta, usa nga high value target ngan nakumpiskaram iton maabot PHP 41,000 nga kantidad hin shabu dida han December 14, 2023 ha Brgy Marlang Isabel, Leyte.
Parehas nga pagkilala iton nakarawat nira PCapt. Lorben Deraco ngan PMSg. Reggie Diola kon diin nakumpiskar han mga kapulisan durante han buybust operations iton maabot PHP 608,903.00 nga gintutuuhan shabu dida han Nobyembre 8 2023 ba Brgy. Cambulao Alangalang Leyte.
Hi PCapt Cartalla ngan PSSg. Hermoso in ginpasidunggan tungod ha pagkaaresto ni Rey Dalumpines usa nga myembro han Espinosa Criminal Gang ha Brgy. Liloan, Ormoc City dida han Nobyembre 6, 2023 ngan balor PHP 500,000 nga gintutuuhan shabu iton narekober han mga otoridad kaupod na an pira nga mga armas ngan bala.
Samtang, hi PSSg Briones ngan PSSg. Latoza in ginkilala tungod han malampuson nga pag-aresto kan Michael Baldedomar dida han nakalabay nga Nobyembre 19, 2023 ha Pasay City
Hi Baldedomar in ginkokonsidera nga most wanted person ha Sinirangan Bisayas kon diin mayda ini ginkakaatubang nga kaso nga murder.
Gin-aghat liwat ni Pawid an mga kapulisan nga igpadayon iton maupay nga pagserbisyo ha komunidad ngan tumanon an mandato han PNP nga ”to serve and protect”
“This founding anniversary is a salient manifestation that we should continue to demonstrate excellence which is a souce of pride for our personnel, from the highest down to the lowest. In this moment we give due commendation to deserving units and personnel who excelled in their area of responsibility, ” mensahe ni Pawid.
