TACLOBAN CITY – Nadakop an usa nga gintutuhan myembro han New People’s Army mahuman nahitabo nga 30 minutos nga engkwentro ha Sitio Manaba, Brgy. Pinanag-an Borongan City, Eastern Samar.
Sumala kan Lt. Col Oliver Alvior, commanding officer han 78 Infantry Battalion, nagdudumara hin focused military operation iton tropa han gobyerno han makabalyuay nira buto an mga rebelde banda alas 3:30 han kulop, Enero 17.
Nadakop ha mao nga operasyon hi Bienvenido Abagancia, 65 anyos ngan residente han Brgy. Layo, Pinabacdao, Samar nga ginbayaan han iya mga kaupod samtang naeskapo ha mga sundalo.
Narekober naman han militar ha encounter site an upat nga mga improvised explosive devices (IEDs), usa nga improvised 7.62mm rifle, usa nga locally-made cal.38 revolver, 16 nga magazines para M-16 nga may 336 nga bala, usa nga M14 magazine nga may 15 nga bala, tulo nga backpacks nga may mga subersibo nga dokumento ngan mga personal nga higamit.
Gindayaw naman ni Lieutenant Colonel Alvior an iya mga tauhan ha ira malinampuson nga operasyon ngan gin aaghat hini an mga Boronganon nga padayon nga suportahan an tropa han gobyerno.
Gin aaghat naman hini an mga nabibilin pa nga rebelde nga sumurender na ha gobyerno para mapahimulusan an mga benepisyo ha ilarom han Enhance Comprehensive Local Intergration Program ( E- CLIP ).
