TACLOBAN CITY – Patay an usa nga residente mahuman nga magbitay ha sulod han iya kwarto ha ira panimalay ha Baybay Leyte.
Ginkilala an biktima kan Ma. Erlinda Enciso, 60 anyos an pangidaron ngan residente han Zone 20 Baybay, Leyte.
Sumala kan PMaj. Jennifer Medalla, Information Officer han Leyte Provincial Police Office, nahikit-an an biktima han iya apo nga nakabitay ha sulod han iya kwarto, dayun naman ine nga nangaro hin bulig han iya nanay para ilugsong an biktima.
Subay han inisyal nga imbestigasyon han kapulisan, nagawas nga may-ada frustrations ha iya sakit an biktima tungod nga dire daw ine naooperahan ngan san-o pa mahitabo an insidente in nagbul-iw daw gihap ine hin yakan nga mas maupay nala nga tapuson niya an iya kinabuhi kay dire man daw nasosolbar adton iya problema.
Waray naman nakikita nga foul play adton mga kapulisan han natabo nga insidente.
Gindara pa an biktima ha Rural Health Unit han ira munisipyo pero gindeklara ine nga dead-on-arrival han attending physician.
