TACLOBAN CITY — Maabot 50,000 nga mga deboto tikang ha magkadurudilain nga parte han Sinirangan Bisayas an ginlalauman nga makikiusa han mga aktibidad nga pagbubuhaton han Archdiocese of Palo yana nga Biyernes Santo.
Sumala kan Fr. Gilbert Urbina, liturgist han Palo Archdiocese, nga yinukot yukot nga mga deboto an ira ginlalauman nga matambong han prosisyon ngan re-enactment han Lord’s Passion o an gin-agian nga kakurian ni Hesu Kristo.
Damo gihapon an nagpepenetensya nga mga kalalakin-an ngan deboto.
Napartisipar gihapon hira han usa nga play o palabas ha Palo Cathedral grounds.
An mao nga mga kalalakin-an in nagpapabilin didto tubtob hit Sabado de Gloria ngan an iba liwat in ginbabantayan an lawas ni Hesus ha Palo Cathedral tubtob han Domingo han Pagkabuhi
Mahibabaruan nga an diocese han Palo in mayda maabot 1.2 million nga mga Katoliko, 63 parokya, 1 chaplaincy ngan 13 nga mission stations nga gintunga ha duha nga distrito.
