TACLOBAN CITY – Nagin malinampuson an gindumara nga “Kasalang Pulis sa Rehiyun Otso” dida han Pebrero 23 han presente nga tuig ha Archdiocesan Shrine of Sto Niňo.
Sumala kan PMaj. Marjorie Manuta, Information Officer hiton Police Regional Office Vlll, an nasabi nga programa in pag-aghat han mga kapulisan nga naglulungon na hin sobra lima ka-tuig ngan adton mga nagpakasal na ha sibil nga magpakasal ha simbahan.
Ada naman ha 50 nga mga magtiayon an naka-avail han mass wedding kun diin 49 han mga ine in kapulisan ngan usa naman an Non-Uniformed Personnel (NUP).
Labot la han libre nga venue han kasal in libre gihapon an venue han reception, cake, documentation, ngan mayda gihapon libre nga hotel accomodation sulod hin duha kaadlaw.
Gin tambungan naman an mass wedding nira anay PRO8 Regional Director ngan yana Philippine National Police Director for Controllership PMGen. Rommel Francisco Marbil ngan Tacloban City Association of Barangay Chairmen President Raymund Romualdez nga nanaglawas kan Mayor Alfred Romualdez.
