TACLOBAN CITY — Patay an tulo nga gintutuuhan tawo han pamilya Espinosa ha natabo nga duwa nga magkasunod nga pamatay ha bungto han Albuera, Leyte.
Syahan, in natad-an an patay nga lawas han biktima nga hi Glenn Cartalina Calunsad ha Barangay Antipolo, bungto han Albuera.
Sumala ha ka live-in partner hini nga nakitan nga nagbabaktas ha gilid han kalsada an mao nga biktima han umagi an usa nga sarakyan nga waray plate number ngan ginpasakay ini.
Mahuman an 2 ka oras in natad-an na ini nga patay ha bukid nga lugar han Brgy Antipolo.
Nakuha naman ha posesyon hini an pira ka sachet han gintutuuhan shabu.
Samtang kinabuwasan in nakit-an naman nga patay an usa nga mag-asawa mahuman an natabo nga shooting insidente ha sapit han Barangay hotel nga gintatag-iyahan han mga Espinosa Cambalading, Albuera, Leyte.
Nakilala an mga biktima nga hira Jesus Bernartolin ngan Sunshine Matan-og, mga residente han Barangay Mabini, Ormoc City.
Subay ha statement han mga panday nga nagpakakita han mao nga insidente nga nagbabantay ha gin re-renovate nga rest house an mag asawa kun diin hira in caretaker han may sumakob nga mga armado nga suspek nga nagkasulot han bonnet ngan tigda nala nga ginpamumusil an mga biktima.
Sumala kan PSInsp Salvador Apacible, hepe han Albuera PNP, nga ha pagkayana in ginhihingita pa nira kun konektado ba an mao nga krimen tungod nga pareho an mga ini gin aalegar tawo han pamilya Espinosa ngan pareho nagpaka bonnet an mga suspek.
