TACLOBAN CITY – Ginpasabot ni Tacloban City Mayor Alfred Romualdez nga iya ginsusuhestyon ngan ginduduso nga magkaada hin 2nd opinion ha kondisyon han San Juanico Bridge mahuman ini nga diri tugutan nga makaagi an mga sarakyan nga malapaos ha 3 metric tons mahitungod han Nakita nga mga guba ha mao nga tulay.
Durante ha nagin Pressconference nga ginpatawag ni Romualdez in ginyakan hini nga iya ginaaghat an national government nga maghingita hin second opinion nga tikang naman ha iba nga assessment han mga independent nga mga eksperto sano naman ini magbuhat hin mga long-term decisions nga makakaapekto ha regional mobility ngan panegosyuhan.
“I believe we need a second opinion regarding the structural integrity of the San Juanico Bridge. We may be overreacting,” yakan ni Romualdez.
“Before making a decision, we should consult other experts. Just like when we’re sick—we seek a second opinion,” dugang pa niya.
Ginsuhestyon pa hini nga magbuhat hin review ha ginpapatuman nga weight restrictions, ngan maghatag hin flexibility ha mga sarakyan sugad han mga waray sulod nga mga trucks, in tugutan nga makaagi pinaagi han paghahatag hin schedules ngan speed limits para masigurado an katalwasan.
Nagpahimatngon pa ini nga kun magkaada hin diri sakto nga solusyon an gobyerno, sugad han pagtitikang han pag construct hin damo nga mga pier para mag compensate han disruption, mas magagastusan pa lugod an gobyerno kumpara han pag aayad han tulay.
Dugang pa ni Romualdez, dapat daw igkonsidera han gobyerno an pagkonsulta ha mga nag ayad han tulay nga Japanese company.
