TACLOBAN CITY– Maabot ha 23,000 nga mga pamilya an nahireport nga nag bakwit ha probinsya hiton Northern Samar han nakalabay nga semana, matungod han bagyong Pepito.
Sumala kan Northern Samar Provincial Disaster Risk Reduction Management Officer, Rai Echano, ha mao nga ihap ada ha 85,000 nga indibidwal an nahirekord nga nanbakwit.
Dugang pa ni Echano, matungod han ira ginhimo nga pre-emptive evacuation, talwas naman an tanan, ngan nakapanguli na an mga ine ha ira tagsa-tagsa nga panimalay.
Ginpaangbit pa hine nga subay ha ira nagin assestment, waray naman may nadarahigan ha pantag hiton agrikultura, ngan sugadman waray naman kaparong an suplay hiton kuryente ha bug-os nga probinsya.
Ha pagakyana, balik na ha normal an tanan nga operasyon, sugad hiton trabaho, klase ngan magin an mga biyahe.
