TACLOBAN CITY – Pormal na nga gin abrihan ha syudad han Borongan an 2025 Regional Schools Press Conference (RSPC) dida han nakalabay nga adlaw.
Mapaso naman nga gin karawat an mga purluminos 3,000 nga mga delegado tikang ha 13 nga dibisyon han Sinirangan Bisayas pinaagi han parada nga nagtikang ha Baybay Boulevard tipakadto ha Eastern Samar National Comprehensive High School para han opening program.
Sumala kan Officer-in-Charge School Division Superintendent, Edgar Tenasas, usa nga pribelihiyo nga matagan hin higayon nga managbalay han 2025 RSPC an Borongan City Division ngan sugadman an LGU han Borongan City.
Gintahan duon pa hine nga an nasabi nga aktibidad hin dire la harumamay nga katitirok hin mga institusyon kundi usa nga pagpa-angbit hin mga ideya, creativity, ngan kolaborasyon han mga magkarit nga mga ‘future journalists’.
Dugang pa hine, an journalismo in dire la pagpasamwak hin mga impormasuon kundi naghahatag gihapon hin paglaum, posibilidad, ngan inspirasyon ha publiko.
Ha lain nga bahin, nagtikang naman kakulop nga adlaw, Pebrero 8, an contest proper ngan mag-iiha ine kutob buwas nga adlaw, Pebrero 10.
An deklarasyon han mga magdadaog in pagdudumaraon naman ha Pebrero 11—ha Capitol Gym para han Elementary level ngan ha Eastern Samar National Comprehensive High School naman para han High School level.
Samtang, an mga magcha-champion naman para han kada category an mahiu-upod ha delegasyon han Sinirangan Bisayas ha 2025 National School Press Conference nga pagdudumaraon ha Laoag City ha Mayo 2025. (via Bombo Shiela Encio)
