TACLOBAN CITY – Patay an duha sundalo mahuman atakehon han mga New People’s Army (NPA) samtang nagbubuhat hin inspeksyon para han Payapa at Masaganang Pamayanan (PAMANA) Road Projects ha boundary han Barangay San Antonio ngan Barangay Catotogan ha Las Navas, Northern Samar, Lunes (Abril 15).
Sumala kan Captain Reynaldo Aragones, tagapagyakan han 8th Infantry Division han Philippine Army, ginkilala an mga namatay nga hira Corporal Robert Bueno ngan Private First Class Ronel Labid, pareho naka-assign ha 20th Infantry Battalion nga nakabase ha barangay San Miguel bungto han Las Navas.
Dugang pa hini nga nakasibilyan la an mga sundalo ngan waray dara nga pusil pero nakilal-an la gihapon an mga ini han mga rebelde sanglit tigda nala hira nga ginpauranan hin bala.
Dayon naman nga umeskapo an mga NPA mahuman an insidente.
Mababaruan nga an ig-iinspeksyon unta han mga sundalo an mga road projects ha barangay San Antonio, Aguinaldo ngan San Isidro kon diin makakadtuan la pinaagi hin pagsakay hin baluto sa sakob hin sobra usa kaoras.
Ini iton karsada nga magkokonekta han mga nasabi nga barangay ha bungto han Las Navas agud mas mapadagmit an pagdara han mga residente han ira mga produkto.
Nagpaabot naman hin pakikisubo an 8th Infantry Division ha pamilya han mga biktima ngan ginsiguro hini nga maihahatag an kaangayan nga mga benepisyo para han mga ini.
