TACLOBAN CITY – Naaresto na han mga kapulisan an duha nga empleyado nga gintutudlok nga suspek ha panholdap ha ira la mismo gintatrabahuan nga gasolinahan ha Naga-Naga syudad han Tacloban dida han nakalabay nga Lunes, Setyembre 30.
Subay ha report tikang ha Tacloban City Police Office, an mga suspek in ginkilala kanda Roland Aures, 27 anyos, supervisor han gasolinahan ngan an katrabaho hini nga driver nga hi Antonito Gomez, 39 anyos.
Sumala kan Pol. Capt. Daniel Polo, hepe han Abucay Police Station 2, natudlok an mga mga suspek pinaagi han CCTV footage kun diin nadiskubrehan nga nagsirbe kumo lookout hi Aures samtang gintututukan hin pusil hi Gomez an cashier nga timing la nga nag iihap han ira halin banda alas 8 han aga.
Mahuman an gin aalegar nga panholdap, mismo an supervisor pa daw an nagreport ha mga kapulisan han insidente.
Ha panginanu han mga imbestigador ha CCTV camera, nahipausa na mga pulis nga usa la kaanggulo han CCTV footage an ginpipinakita ni Aures ngan diri hini upod an parte nga nagsesenyas hiya ha holdaper.
Han nagsumiter naman hin bug-os nga kopya han CCTV footage an tag-iya han gasolinahan didto nahisabtan nga nagserbi nga lookout an supervisor nga han iya kadakop in gin amin hini an ira ginbuhat nga krimen.
Dugang pa ni Polo nga bisan kon nakasul-ot hin face mask ngan helmet an nan-holdap nga hi Gomez, nakilal- an naman daw ini han iya mga katrabaho tungod han iya boses, panlakat ngan panapton.
Ha kabug usan maabot hin P800k an nadara han mga suspek, pero ginbabana bana nga aada nala ha P200k an nahibalik nga kwarta ha tag iya han gasolinahan.
Ha pag iimbestigar pa han mga kapulisan nadiskubrehan nga mayda warrant of arrest hi Gomez tungod hin kaso nga murder ha San Pedro, Laguna.
Ha pagkayana in nagpapabilin ha kustodiya han mga kapulisan an mga suspek ngan naatubang hin kaso nga robbery holdap ngan illegal possession of firearms.
