2 nga barangay ha Tarangnan Samar kun diin nag uukoy an 2 nga panibago nga nagpositibo ha COVID-19, ginpailarom na ha total lockdown

TACLOBAN CITY — Iginpailarom na ha total lockdown han local government unit (LGU) han Tarangnan Samar an duwa nga barangay kun diin nag uukoy an duwa nga panibago nga nagpositibo ha coronavirus o COVID-19.

Sumala kan Tarangnan Mayor Arnel Tan, nga dayon niya nga iginmandu an pagpapasara ha duwa nga mga barangay kun diin waray na gintutugutan nga makasulod ngan gawas agud nga malikayan an pagkalat han virus.

Waray naman daw angay nga igkabaraka an mga residente nga nag-uukoy dinhi tungod nga an LGU la anay an magbabaton han ira mga panginahanglan sugad hiton pagkaon samtang nakapailarom ha total lockdown.

Dugang pa hini nga an duwa nga barangay la an ira iginpailarom ha total lockdown matungod nga kukurian ngan diri nira maakos kun igpatuman nira ini ha bugos nga bungto.

Tungod hini in mas ginpahurugot naman nira an pagpatuman hin checkpoint ha kada barangay kun diin mas strikto na nga igpapatuman an 1 person per household la nga makakagawas pamalit hin importante nga kinahanglanon.

Nanawagan naman an mao nga alkalde ha mga nasasakopan hini nga makipagkoopirar agud nga diri na kumalat pa an mao nga virus.