TACLOBAN CITY – Gin anunsyo hiton 8th Infantry Division han Philippine Army nga bumalik na ha Sinirangan Bisayas an 19th Infantry Battalion mahuman an upat katuig nga peace building mission ha Mindanao.
Sumala kan Major General Pio Dinoso III, commander han 8th ID nga gintagan hira hin kadugangan nga personnel ngan assets han general headquarters han Philippine Army tungod nga maupay an ira pagdumara ha pagbabantay han seguridad ha rehiyon ha luyo han ginkakaatubang nga COVID 19 crisis.
Mababaruan nga kakulop nga adlaw, Hunyo 11, umabot ha Calbayog Airport an 19th Infantry Battalion ngan lalauman nga ig-station ini ha probinsiya hiton Samar para makabulig ha anti insurgency operations han gobyerno an masobra 500 hini nga mga sundalo.
An 19th IB in dati na nga naka-station ha Brgy. Aguiting Kananga, Leyte san-o ini igbal-in ha Arakan, North Cotabato dida han 2016 para bumulig ha kampanya han gobyerno ala kontra ha Bangsamoro Islamic Freedom Fighter ( BIFF )
Ha pagkayana in mayda na walo nga army battalion ha Samar provinces kaupod na an kaoorganisa pala nga 52nd Infantry Battalion nga nakabase ha Eastern Samar.
Ginsiguro liwat ni Dinoso nga bisan kon mas ginpakusog nira an ira kampanya ala kontra ha mga rebelde in waray hira gintatalapas nga katungod pantawo.
Kon panginginanuon la daw an iton mga datos han AFP, makikit-an nga waray ginhaon nga reklamo ala kontra han mga sundalo ha rehiyon han nakalabay nga lima katuig nga may kalabutan ha pagtalapas ha katungod pantawo.
Padayon naman nira nga gin aaghat an mga rebelde nga magbalik loob ha gobyerno para magkaada hin mas mahimyang nga kinabuhi ngan mapahimulusan an benepisyo ha ilarom han E- CLIP program.
