TACLOBAN CITY – Maabot hin 151 nga mga candidate soldiers an nag-gradwar yana nga adlaw, Agosto 2, ha ginbuhat nga simple nga seremonya ha 8th Infantry Division headquarters ha Catbalogan City, Samar.
Ha mensahe ni Major General Pio Diñoso III, commander han 8th Infantry Division, gindayaw hini an class 633-2020 Matikas tungod nga malinampuson nira nga natapos an makuri training ha sakob hin haros unom kabulan.
An ira daw disiplina nga nabaruan ha training in ira magigin armas ha pagtuman ha ira magigin responsibilidad.
Lalauman nga an mga bag-o nga sundalo in magigin kadugangan nga pwersa han militar ha pagbantay ha seguridad ha Sinirangan Bisayas.
“Napakaswerte ninyo at kayo ay nagin sundalo at time we are about to finish the internal security campaign here in our country, here in Eastern Visayas we intend to finish it on 2022. And you can say to your children, family and friends later on that were part of the division who concluded peace and order problem here in Eastern Visayas”, pahayag ni Diñoso.
Nagpahimatngon gihapon hi Diñoso ha mga bag-o nga sundalo nga gamiton an ira disiplina ngan armas ha maupay ngan ensakto nga butang.
“You have now your issued firearms, its an instrument of peace, it should be used to persuade enemy not to use violence”, kadugangan nga pahayag han heneral.
Mababaruan nga an mga nag-gradwar nga candidate soldiers in nagtikang ha iba iba nga lugar ha Pilipinas kon diin 102 hini tikang ha Samar, 37 ha Leyte, tag usa an tikang ha Negros Occidental ngan Iloilo, 2 tikang ha Cebu, 6 ha Mindanao ngan 2 ha Luzon.
Ha 151 nga bag-o nga sundalo, 60 han mga ini in nakatapos ha kolehiyo, 35 an undergraduates, 51 an nakahuman hin high school nga may special skills tikang ha Technical Education and Skills Development Authority ( TESDA ) ngan 5 an nag-gradwar hin vocational courses.
Hira in ginpailarom ha basic military training, orientation and practical application ngan specialization training ha headquarters han 8th Infantry Division tinikangan dida han Pebrero 7.
Mahuman an ira graduation, hira in ma-eenlist ha Philippine Army ngan magkaada hin ranggo nga private.
Samtang, nag- aro naman hin despensa hi Diñoso ha mga kag anak han mga nag-gradwar nga sundalo nga waray tuguti nga makaatendir han katitirok alinsunod na gihapon ha mga ginpapatuman nga protocols may kalabutan ha COVID-19 pandemic.
