JAVIER, LEYTE – Usa nga high school student an nakuhaan hin gin aalegar ilegal nga droga ha usa nga iskuylahan ha Javier, Leyte dida han nakalabay nga adlaw.
Ginkilala an istudyante nga usa nga 14-anyos ngan Grade-9 level.
Sumala kan Javier Municipal Police Station Officer-in-Charge, PLt. Jeffrey Tapales, menor de edad pa an istudyante nga nakuhaan han ilegal nga droga.
Basar han imbestigasyon, naglilibot an usa nga staff han iskuylahan han makit-an hini an tulo nga istudyante nga nakadto han hallway han luyo nga building kun diin han dadaupon na unta an mga ini han staff in nagin kaduda-duda an mga aksyon hini ngan tigda nga mayda gintago ha iya bursa an usa nga haira.
Dida han gin-uupdan na an mga istudyante tikadto ha guard house agud ig lista an ira ngaran in tigda nga mayda ginlabog an usa nga bata ha usa nga e-bike nga nakaparada, kun diin nakit-an naman ini han usa nga utility personnel, ngan ha pagpuruta hini in nakuha an usa ka-sachet han gin aalegar ilegal nga droga.
Mahuman an nagin dokumentasyon ha iskuylahan, gindara an bata ha opisina han Department of Social Welfare and Development ha Javier para han kadugangan nga pamakiana ngan agud magtudlok hin kaangayan nga interbensyon.
Kalakip naman ha mga gindara ha DSWD an duha pa nga kabataan nga kaupod han naglabog han sachet.
