TACLOBAN CITY – Utro nga nakakuha hin nakaputos nga package an mga tawuhan han Tacloban City Jail Male Dormitory mahuman nga mayda indibidwal an naglabog han nasabi nga package.
Sumala kan Tacloban City Jail Male Dormitory Jail Warden, JCInsp. Benedicto Ramirez Jr., nakabati hira ha ira radyo nga mayda naglabay hin kontrabando ha sulod han pasilidad, kun diin dayun naman ini nga ginrespondehan han ira mga tawuhan.
Gin beripika naman han mga tawuhan han ahensya an lugar nga ginlabayan han package agud madakop gihapon an indibidwal nga naglabay hini.
Kadungan hini, gin-secure gihapon an package nga ginlabay ha sulod ngan didto nakit-an nga nakaputos ini hin green nga dugnit ngan masilhag nga scotch tape.
Sumala pa kan Ramirez, ini na an ikaupat kabeses nga mayda naglabay hin kontrabado ha sulod han ira pasilidad kun diin an nauna nga tulo in kumpirmado nga shabu ngan marijuana.
Samtang, ha pag-abrihi han package in nakit-an an lima ka-sachet han gin aalegar nga shabu, resibo, ngan usa ka-sachet hin marijuana nga nakadukot han resibo, glass tubing, ngan upat nga disposable nga lighter.
Nakigsumpayan naman an ahensya ha Philippine Drug Enforcement Unit, PNP-Drug Enforcement Group, sugadman ha membro han media ngan Brgy. Official agud magtestigos han pag-imbentaryo.
