Gin pahitaas na han World Health Organization (WHO) ha “very high” an kadelikaduhan han pagduro han outbreak han Bundibugyo strain han Ebola ha Democratic Republic of Congo (DRC).
Sumala kan WHO Director-General Tedros Adhanom Ghebreyesus, nagpapabilin nga hitaas an posibilidad nga malaksi pa nga magsarang an virus ha sulod han nasud, samtang “high” naman an risko ha rehiyon ngan “low” ha pankalibutan nga lebel.
An Bundibugyo strain in usa nga klase hin Ebola nga waray pa aprubado nga bakuha o sigurado nga tambal ha presente.
Ha pinakaurhi nga datos, ada ha 82 na an kumpirmado nga kaso ha Congo, kaupod an pito nga kumpirmado nga namatay. May-ada gihapon sobra 170 nga gin aalegar mga namatay ngan haros 750 suspected cases nga padayon nga gin iimbestigahan.
Ha Uganda naman, duha nga kaso na an nakumpirma tikang ha mga biyahero tikang ha Congo, kun diin usa ha mga ini in namatay.
Subay ha WHO, epektibo ha Uganda an mahugot nga contact tracing ngan pagkansela han dagko nga katitirok agud mapugngan an pagsarang han sakit.
Gin kumpirma gihapon han WHO nga usa nga American national nga nagtatrabaho ha Congo an natapnan han virus ngan ginbalhin ha Germany agud magpatambal. Mayda pa usa nga Amerikano nga posible nga exposed ha virus an iginbalhin naman ha Czech Republic.
