TACLOBAN CITY – Usa nga locally stranded individual an nagreklamo ha mga kapulisan tungod daw nga mayda usa nga waray pa kakilal-i nga tawo an pirit nga naghihikasulod ha iya quarantine room ha Oras, Eastern Samar.
Ginkilala an biktima nga hi Christel Bajado, 31 anyos, may asawa ngan residente han mao nga lugar.
Sumala kan PSSg. Arnel Quitorio, Duty investigator han Oras MPS, nakakarawat hira hin tawag tikang ha Municipal Health Officer (MHO) han ira bungto bahin han daw komosyon nga nahitatabo ha isolation facility ha Oras National High School.
Subay naman han pahayag han biktima, tigda daw la nga may umulpot nga tawo nga dire niya kilala nga naghihikasulod ha iya kwarto.
Waray naman naangkon nga injury o distroso an mao nga LSI tungod nga nakaaro ini hin bulig san-o pa man nga makasulod an suspek.
Ha pagkayana in padayon pa nga gin-iimbestigaran an posible nga motibo han waray pa kakikilal-i nga suspetsado.
