Iginpahayag ni Vice Presidente Sara Duterte nga mayda usa nga nasud na an tumugot nga kumarawat ha iya tatay nga hi anay Pangulong Rodrigo Duterte, nga presente naka-detine ha The Hague, Netherlands samtang ginhe-hearing ha International Criminal Court (ICC) mahitungod han mga kaso may paghisumpay ha crimes against humanity kasumpay han iya madugo nga kampanya kontra ha ilegal nga droga.
Ha iya speech ha atubangan han mga Pilipino ha Japan dida han Sabado, ginmalatumat ni VP Sara nga hiya mismo an nakipagnegosasyon ha mga nasud agud makabiling hin matatapuran nga nasud nga makarawat ha iya tatay, mahitungod nga waray daw matatapuran ha Pilipinas.
Waray naman ngarani han bise presidente an nasabi nga nasud, pero gin sigurado hine nga dire ine Japan. Nauna na gihapon nga ginmalatumat han Australia nga dumire ine nga karawton hi Duterte.
An pahayag in kasunod han hangyo han kampo han anay presidente para ha interim release nga ginpasaka dida han Hunyo.
Duon pa han abogado hine, waray flight risk hi Duterte ngan dire daw kinahanglan magpabilin nga nakadetine ine samtang ginhe-hearing.
Sugadman, bumaribad an Office of the Prosecutor han ICC, ngan iginduon nga kinahanglan an padayon nga pagkakapreso ni Duterte agud masigurado an iya pag-atender ha pagdungog, ngan agud malikayan an posible nga panginlabot ha kaso o ha mga testigos.
