Nagpalusad hi Senador Ronald “Bato” Dela Rosa hin duha nga balaudnon ha butnga han iya padayon nga pag-absent ha Senado.
Basar ha rekord han Senado, kaupod ha balaudnon nga ginpirmahan ni Dela Rosa in an Proposed Senate Bill No. 2080 o an Counter Foreign Interference Act nga naghahatag sirot ha pangingialam han mga langyawanon ha nasud, nga ginsumite naman dida han Lunes kaupod an pagbalik-sesyon han kapulungan mahuman an usa ka-bulan nga recess.
Ginpalusad gihapon hini an Senate Bill No. 2079 o an National Police Clearance System Act, nga may panuyuan pakusgon an operasyonalisasyon han sistema kaupod an pagpapabilin han centralized record han tanan nga nahipatik nga crime incidents, warrants of arrest, mga litrato ngan personalized details han mga gindakop ngan wanted persons.
Manunumduman, tikang dida han Nobiyembre han nakalabay nga tuig in waray na magpapakita ha publiko hi Sen. Dela Rosa ngan waray na a-atender hin mga sesyon ha Senado ha butnga han urusturyahon nga nag-isyu an International Criminal Court hin arrest warrant kontra ha iya kasumpay ha war on drugs.
Presente gihapon naatubang an Senador ha ethics complaint mahitungod ha pagigin absent ha Senado.
