BAYBAY CITY – Patay an usa nga lalaki mahuman nga panmumusilon han waray pa kakikilal-i nga mga suspek ha usa nga public market ha Baybay City dida han nakalabay nga mga adlaw.
Ginkilala an biktima kan alyas “Watari”, 48 anyos, usa nga food vendor ngan residente han Brgy. Punta, Baybay City.
Basar hiton imbestigasyon han mga otoridad, sumulod an duha nga mga suspek ha merkado kun diin, didto nira ginpamumusil an biktima, naigo ini ha ulo rason han dayon nga kamatayon hini.
Dagmit naman nga kumaligiw an mga suspek sakay han usa nga single motor tipakadto ha direksyon han Albuera, Leyte.
Nahibaruan naman nga an biktima in may-ada pending warrant of arrest ha kaso nga illegal Possession of Firearms.
Ha pagkayana, in nagdudumara na hin operasyon iton mga otoridad agud mabilngan ngan madakop an mga suspek.
