Agud maibanan an kabug-at nga nae-eksperyensyahan han mga Pilipino mahitungod ha padayon nga paghitaas han presyo han lana resulta han tensyon ha Middle East, iginsawalad ni Senadora Loren Legarda an tulo nga panukala nga balaod nga panuyo repormahon an sistema han value-added tax (VAT) ha nasud.
Panuyo han comprehensive reform package nga pahabubuon an pankabug-usan nga VAT, tanggalaon an buwis ha mga pangunahon nga papliton, ngan ig sakto an sistema ha panukot han kuryente.
Ha ilarom han Senate Bill No. 1851 o Differentiated Value-Added Tax Rates Act, ig uubos tikang ha 12% tikadto ha 10% an pankabug-usan nga VAT rate.
Sugadman, magpapabilin an 12% nga buwis nga igbubutang ha mga luxury goods, marahalon nga sarakyan, premium residential real estate, ngan sin products.
Iginduduso gihapon han senadora an Senate Bill No. 1857 o Murang Bilihin at Serbisyong Medikal Act, nga maghahatag hin VAT exemption ha mga over-the-counter (OTC) nga medisina, de-lata, tinapay, sabon, ngan magin ha lifeline thresholds nga kunsumo ha kuryente, tubig, ngan basic internet access.
Samtang, igin salawad gihapon an Senate Bill No. 1859 agud klaruhon an pagbubutang hin VAT ha mga electricity subsidies ngan statutory charges ha ilarom han Electric Power Industry Reform Act (EPIRA).
Tatanggalon hini ha VAT exemption an lifeline subsidies para ha mga kablas ngan senior citizen discounts.
Nasunod ini ha doktrina han Korte Suprema nga dire dapat buwisan an pondo nga dire direkta natatagamtaman han mga kumpanya han kuryente.
