TACLOBAN CITY – Maduon nga igindiwara ni Student Regent and LNU Supreme Student Council President, Jon Ivan Torreros an iya koneksyon mga walhun nga grupo.
Ine in mahuman nga ma-red tag hi Torreros kumo recruit han walhun nga grupo ngan nakapailarom ha surveillance han gobyerno mahitungod han mga post hine ha social media ngan han mga pamulong hine.
Ha eksklusibo nga pakighimangraw han Bombo Radyo Tacloban kan Torreros, ginbuyagyag hine nga dida han Agosto 4 han presente han tuig in gin bisita hiya ha ira panimalay hin upat katawo—an ira Kapitan, duha nga nagpakilala nga militar, ngan usa nga anay membro han walhun nga grupo—pero nahituman naman nga waray hiya ngadto ha ira sanglit an iya mga kag-anak an gin kaistorya han mga ine.
Ginpakita ha iya kag-anak an iya mga Facebook post, kun diin sumala daw han mga nagbisita haira in kinahanglan hiya nga proteksyunan mahitungod nga duro na hin kahaglarom an iya mga pamulungan ngan ine an gingagamit nga mga termino han mga rebelde.
Pero sumala kan Torreros, dire na ine bag-o nga iya sugad nga pamulong mahitungod nga hadto paman in kritiko na hiya ha mga butang o polisya nga dire nakakaupay ha katawhan ngan iya ine ginpapaangbit ha social media, ngan labot pa hine, in membro gihapon hiya han campus journalism sanglit maaram hiya han mga haglarom nga termino.
Dugang pa hine, nakadamo pa bumalik ha ira panimalay ine nga katawhan ngan nagtatalaan hin petsa ngan adlaw han ira paghampang pero dire an mga ine nagdayon pakighampang haiya.
Samtang, nanawagan naman hi Torreros ha Peace Builders nga undangan na an mga akusasyon kontra haiya mahitungod nga dire hiya magigin kaparte han walhun nga grupo, sugadman dire ig basar ha iya mga post ha social media an mga alegasyon nga ginbabatak ha iya.
Nagpasalamat gihapon ine ha mga organisasyon ngan katawhan nga nagpapagawas hin pahayag hin pagsuporta ha iya ngan sugadman ha mga nagpapamatuod nga dire hiya membro han walhun nga grupo ngan waray hiya plano pagbulig ha mga ine.
