CATBALOGAN CITY — Nangangandaman na an Technical Education and Skills Development Authority (TESDA) Samar para ha Samar Skills Competition, usa nga aktibidad han kumunidad nga magseserbi nga entablado agud maipakita han mga technical-vocational learners an ira mga nahibaruan para ha panginahanglan han lokal nga industriya.
Magdudumara an TESDA hin provincial competition kumo pangandaman para ha TESDA Skills Competition, kun diin matatagan hin tyansa an sektor han Technical-Vocational Education and Training (TVET) han Samar nga igparayaw an kakarit ha pantag han konstruksyon, elektrikal, electronics, garments, ngan turismo.
Ginlalauman naman nga pagbubuhaton an Samar Provincial Skills Competition ha Marso 19–20, 2026, nga bubuligan han walo nga trade areas nga igre-representa han magkaduru-dilain nga Technical-Vocational Institutions (TVIs) ha bug-os nga probinsya.
Pagbubuhaton naman an pag-aabri han programa ha PHTTI–Catbalogan Branch, kumo pormal nga pagtitikang han duha kaadlaw nga aktibidad nga magpapakita han hibaro ngan talento han mga TVET learners han Samar.
Ha gindumara nga coordination meeting dida han nakalabay nga Enero 21, nahingadayan han TESDA ngan mga kasugbong hine, an mga aludayday han paisan-isan, kaupod an age requirements, trade-specific mechanics, ngan an pagbug-os han komite agud masigurado an hapsay ngan klaro nga aktibidad.
Nagpatapod gihapon an mga kalakip nga institusyon nga maghahatag hin lugar ha kada trade area, logistical supports, ngan experts assistance—pagpamatuod han urusa nga responsibilidad han mga stakeholders para ha usa nga organisado ngan malinampuson nga provincial competition.
Ginlalauman naman han TESDA nga mas mahilarom pa an paghahatag hin importansya han kumunidd ha TVET yana nga tuig; gintatagan-duon gihapon nga an paghag-id ha hibaro in pundasyon han paghulma han mga skilled manpower ngan dire la usa nga alternatibo nga dalan han edukasyon.
Gintagan-duon naman ni Larry Mark E. Orbong, TESDA Specialist II ngan CAC Unit Head han TESDA Samar, nga an kompetisyon in higayon para ha mga istudyante nga mas hag-iron pa an ira hibaro ngan mapahitaas an ira tyansa ha trabaho.
Gin aaghat naman han TESDA an mga kwalipikado nga kabataan ngan TVET learners ha Samar nga makiusa, ngan ginhulagway an aktibidad kun tulay tikang ha paghag-id tikadto ha mas hitaas nga lebel han hibaro, kontribusyon ha kumunidad, ngan mas haluag nga oportunidad ha maabot nga mga panahon.
