MAYORGA, LEYTE – Nagsurender na ha kapulisan an suspek ha pamusil han 27-anyos nga babaye ha Brgy. Gen. Antonio Luna, Mayorga, Leyte, dida han nakalabay nga adlaw.
Ginkilala an biktima kan alyas Ninay, 27-anyos an pangidaron, samtang an suspek naman in hi alyas Natoy, 47-anyos an pangidaron, ngan parehas residente han nasabi nga barangay.
Manunumduman nga dida han nakalabay nga adlaw, Agosto 23, in ginpamusil an biktima han suspek samtang nagbabaktas ine kaupod an iya anak tikadto han proper han barangay para unta mag-charge han iya cellphone ugsa umatender han misa.
Kun diin, tigda ine nga tapo han suspek ngan ginpamusil. Nag-angkon an biktima hin duha nga inig-an ha may nawong ngan but-ol.
Nadara pa naman an biktima ha Abuyog District Hospital pero gin deklara ine nga dead-on-arrival han attending physician hine.
Pagbulos naman an ginkikita nga motibo han pamusil mahitungod han gin pasaka nga kaso han biktima nga Acts of Lasciviousness ha suspek.
Ha pagkayana in nakapaslak na an suspek ha Mayorga Municipal Police Station ngan kakaatubangon an kaso nga murder.
