NATIONAL – Gin anunsyo han Philippine National Police (PNP) nga nagtudlok hira hin 37,750 nga kapulisan ha ilarom han Oplan Balik-Eskwela 2025–2026 ha bug-os nga nasud kumo kaparte han pag-aabri han klase yana nga adlaw, Hunyo 16.
Subay ha PNP, babantayan han kapulisan an ada ha 45,974 nga kabug-usan nga iskuylahan, kaupod hine an 38,292 nga mga public schools ngan 7,682 nga private schools.
Mayda gihapon nga 5,079 na mga police assistance desk nga pagtatawuhan hin 10,759 pulis, samtang 10,687 naman an magdudumara hin mobile patrols kaupod pa an 16,366 nga foot patrols.
Ha datos han pulisya, pinakadako nga deployment han mga kapulisan in ada ha Central Visayas nga mayda 7,366; Metro Manila: 4,323, Bicol Region: 2,962, Eastern Visayas: 2,376, ngan Bangsamoro Region: 2,898 pulis para ha 657 nga iskuylahan.
Syahan na hine nga ginpahayag ni PNP Chief Gen. Nicolas Torre III, nga an katalwasan han mga istudyante, magturutdo, ngan mga school staff an iya pangunahon nga panuyo para ha pagtitikang han klase.
