ODD – Sobra 100,000 ka-tawo an kumadto ha downtown han Chongqing, China han nakalabay nga Hunyo 17 para makit-an an usa nga pinakadako nga drone light show.
Kapot hini an Guinness World Records title para ha “largest number of unmanned aerial vehicles (UAVs) airborne simultaneously.”
Ha nasabi nga event, naglamrag an langit han siyudad pinaagi han 11,787 nga gudti-ay nga drone nga nagdudrungan nga naghimo hin mga magkadurudila-in nga kolor, porma, ngan mensahe.
Nagpakita ini hin magkadurudila-in nga hulagway nga diri makakalimtan han mga nagkita, sugad han tradisyonal nga bukad han Chongqing kutob ha mga lokal nga maskot.
Labot la ha kali-awan, iginpakita gihapon han mga mulupyo han mao nga siyudad an kapasidad nira ha drone cluster technology ngan low-altitude management.
Subay naman han mga nag-organisa han event, umagi ha mahugot nga pagplaplano ngan sagunsun nga praktis an nasabi nga show agud masiguro nga an kada drone in malupad ngan magdududrungan.
