TACLOBAN CITY – Nagtutuo an Simbahang Katoliko nga dako an maibubulig ha kahimyang han sosyodad kun hul-os nga maipapatuman an ginduduso nga Mandatory Bible Reading.
Una hini, an House Bill 2069 o mandatory bible reading act in ginduduso ni House Minority Leader ngan Manila Rep. Benny Abante Jr.
Sumala kan Fr. Gilbert Urbina, kura-paruko han Palo Cathedral, positibo hiya nga dako an maibubulig han mao nga balaudnon labi na ha mga kabataan agud nga mahibaro ngan magiyahan han mga pagturun-an han bibliya.
Nagtutuo naman ini nga kun mailalakip na ha curriculum han mga pampubliko nga eskwelahan an bible reading kinahanglan naman nga igrespeto an pagtuo han mga studyante nga iba an relihiyon.
Dugang pa hini nga an mandatory reading in usa gihapon ha iya nakikita nga solusyon ha pagpahamubo han krimen ha nasud nga ginkakadabihan han mga kabataan matungod nga magigiyahan naman hira han pulong ngan pagturun-an han Diyos.
Napapanahon na daw gihapon nga buhi-on an nakakalimtan na nga buruhaton ha kada pamilya sugad nala han pagtutdo han mga maupay nga pagturun-an ha bibliya labi na ha mga millenials nga nasakop na han makabago nga teknolohiya.
