NATIONAL – Ginpapakasuhan na han National Prosecution Service hira Shiela Guo nga daw bugto ni dismissed Bamban Tarlac Mayor Alice Guo ngan Cassandra Li Ong nga daw natindog kumo authorized representative han gin-raid nga POGO hub ha Porac, Pampanga.
Subay ha ahensya, an kaso nga igpapasaka ha duha in pagtalapas ha Article 150 han Revised Penal Code for Disobedience to Summons nga gin isyu han senado. Kaupod gihapon ha mga gin rerekomenda nga kaso in may paghisumpay ha paggamit ha peke nga pasaporte.
Manunumduman nga gin kumpirma han National Bureau of Investigation dida han nakalabay nga semana nga hi Shiela Guo in nakakuha hin Philippine Passport pinaagi han ilegal nga pamaagi.
Igin mando na gihapon han National Prosecution Service an paghahaon hin kaso kontra ha Cassandra Li Ong mahitungod ha disobedience hine ha mga summons nga iginpalusad han Lower Chamber of Congress.
Mag-aatubang gihapon ine ha reklamo nga obstruction of justice for harboring, concealing, or facilitation the escape of a criminal offender nga may paghisumpay la gihapon ha ilegal nga paglayas ha nasud ni Alice Guo.
Ginrerekomenda gihapon han NPS ha NBI an kaso nga falsification ngan ha iba pa nga ahensya han gobyerno para ha ira pagbubug-uson nga kaso ngan imbestigasyon.
