Nagdig-on hi Senador Risa Hontiveros nga “aton an West Philippine Sea” ha iya personal nga pagbisita kakulop nga adlaw, Pebrero 21 ha Pag-asa Island, usa nga kaparte han Kalayaan Island Group (KIG).
An pagbisita han Senadora ha isla in kaparte han iya selebrasyon para han iya ika-60 nga kaadlawon yana nga Pebrero 24.
Dinhi in nagdul-ong an Senadora hin essential goods ngan medical services para ha mga sibilyan nga Pilipino ngan frontliners nga naka-istasyon ha isla.
Ha usa nga pahayag, ginmalatumat ni Sen. Hontiveros nga an iya pagbisita ha Pag-asa Island in kumo pagpapakita han iya suporta ngan pakikiusa ha mga kababayan nga Pilipino nga naukoy ha Kalayaan.
Dugang pa hini, an mga residente ha isla ngan an ira munisipalidad in kaparte han Pilipinas sanglit dire ini pwede pabay-an.
Nakigkita gihapon an Senadora ha mga lokal nga opisyal han bungto han Kalayaan ha pangunguna nira Mayor Beltzasar Alindogan ngan Vice Mayor Maurice Albayda.
Ginpadig-on han magbabalaod an iya suporta para ha mga lider nga nadepensa ha soberanya han Pilipinas ha WPS.
