TACLOBAN CITY – Ginpahayag han LGU han Palo, Leyte nga magigin duro ka simple la an ira pagdudumaraon nga aktibidad para han tidaraon nga anibersaryo han Leyte Gulf Landing yana nga tuig matungod hiton COVID-19 pandemic.
Sumala kan Palo Mayor Frances Ann Petilla, nga waray la anay pagdudumaraon nga mga dumagko nga aktibidadis kundi simple la nga flag ceremony ngan wreath laying ceremony.
Dugang pa hini nga labot la ha pag commemorate han mga bayani ha mao nga adlaw in magdudumara gihapon hira hin recognition ha tanan nga mga health workers ngan frontliners nga amu iton bago nga bayani yana nga panahon nga padayon nga nakikipag asdangay ha giyera kontra ha COVID-19.
Kasumpay gihapon ha selebrasyon han anibersaryo han Leyte Landing magkakamay-ada gihapon online singing and dance contest an LGU an Palo agud nga maghatag hin karisyo ha mga mulopyo nga aada la ha ira mga panimalay.
