TACLOBAN CITY – Nakatalaan nga pagdumaraon an coronation night han Sangyaw Queen 2025 ha maabot nga Hunyo 24, Martes, kun diin lima nga kandidata an magpapaisan-isan ha kahusay, kabaltok, ngan kasing-kasing para han prestihiyoso nga pageant kumo kaparte han selebrasyon han kapatrunan han syudad.
Sumala kan Search for Sangyaw Queen, Program Director, Ms. Hazel Superable Mañas, an nasabi nga kompetisyon in dire la pahusayay kundi usa gihapon nga fundraising event.
An matitirok nga pondo tikang ha kompetisyon in gagamiton para ha mga proyeko ngan inisyatibo han Sangyaw Foundation ha bug-os nga tuig sugad han community outreach, educational initiatives ngan iba pa nga mga socio-cultural undertakings.
Samtang, opisyal nga ginpakilala ha publiko an lima nga kandidata para han nasabi nga paisan-isan sugadman an ira mga adbokasiya.
An mga ine in hira:
- • Karen Cañete – Raz, representante han DepEd Tacloban City;
- • Lucille Bahin-Macato, representante han Liga ng mga Barangay Tacloban City Chapter;
- • Hermenia Peneda, representante han Office of the Senior Citizens Affairs;
- • Keena Mate, representante han City Government of Tacloban; ngan
- • SFO1 Lorraine Camille Israel, representante han Bureau of Fire Protection Tacloban City
Gin-aaghat naman an publiko nga magkita ngan suportahan an mga kandidata.
