NATIONAL–Nagserbe hi House Majority Leader Ferdinand Alexander “Sandro” Marcos hin balaodnon nga nagtutumong nga igpatuman an mahugot nga “no work no pay” para ha mga miyembro han Kongreso agud nga mabatonan an problema han pag-absent ha trabaho, igpakusog an obligasyon, ngan proteharan an pondo han nasud.
An House Bill No. 7432 nga gintawag nga “No Work No Pay for Members of Congress Act” in naka-set na an sweldo ngan iba pa nga benepisyo han mga senador ngan representate in direkta na nga naka-konekta ha ira aktwal nga pagsulod ngan partisipasyon ha mga sesyon han plenaryo, hearing han mga komite, ngan iba pa nga opisyal nga obligasyon lehislatibo.
Dugang pa ni Marcos nga nasuporta ini ha transparency, accountability ngan integridad ha gobyerno.
Ilarom hiton balaodnon, babaydon la an mga mambaralaod ha mga adlaw nga present an mga ini ngan aktibo nga nagbubuhat hin opisyal nga butang, sugad ha pag-atender ha plenaryo, partisipasyon ha mga hearing han komite kun diin sakop hira, ngan pagbubuhat hin mga otorisado nga opisyal nga aktibidad.
Ginpapabuhat naman han balaodnon an pan adlaw adlaw nga monitoring ngan attendance ngan himuon nga abri ha publiko an mga record han pagsulod.
Ginkokonsidera gihapon ngha present an mga mambaralaod kun umatender hira ha mga otorisado nga hearing han mga komite, sesyon han Commission on Appointments, House of Representatives Electoral Tribunal, bicameral conference committees, ngan mga opisyal nga misyon nga aprubado ha Speaker.
An pag-absent hin waray ensakto nga rason in magreresulta ha pagkawaray hin kompensasyon, samtang igkikilala naman an mga mayada balido nga rason sugad han pagkakasakit nga mayada kompensasyon hin lisyensyado nga doctor, opisyal nga representasyon, aprubado nga biyahe o misyon ngan gintugutan nga leave of absence.
Samtang, ginhisgotan gihapon ni Marcos an istroya konstitusyonal, ginduon nga klaro ha 1987 Konstitusyon nga an opisyal nga kompensasyon han mga miyembro han Kongreso in pwede ig-iskedyul ha pamaagi han balaod.
