TACLOBAN CITY – Nagtutuo hi Samar 1st District Rep. Edgar Mary Sarmiento nga kinahanglan nga magpatawag hin special session ha ira ni Presidente Rodrigo Duterte para masolusyunan an problema o himangrawon bahin han kinada semana nga paghinitaas han presyo han produktong petrolyo ha nasud nga gin-aaraba han kadam-an ha pagkayana.
Sumala kan Cong. Sarmiento, chairman han house committee on transportation, ha ginpatawag nga adhoc committee hearing ni Speaker Allan Velasco, ginpaghingadayan nira an bahin han mao nga himangrawon.
Tumambong ha mao nga ad hoc hearing an opisyales han Department of Energy (DOE) kun diin ginsiguro hini nga supresyente an suplay han lana ha nasud nga mahagos pa ha sakob hin 40 kaadlaw.
Sumala naman kan Sarmiento, dire an suplay an problema ha pagkayana kundi an presyo mismo han lana nga padayon an paghinitaas.
Tungod hini in naglalaum hira nga magpatawag hin special session hi Presidente Duterte agud nga maaddress an mao nga problema.
Ginsisiguro naman han Kamara nga bubuhaton an anoman nga pitad nga makakaupay para ha ngatana agud nga maibsan an araba han mga konsumidor.
