Gin kumpirma han Office of the Ombudsman nga ira na nakarawat an ‘referral’ ng National Bureau of Investigation kasumpay ha gindumara hini nga pag-iimbestiga ha Statement of Assets, Liabilities and Net Worth o SALN ni Vice President Sara Duterte.
Subau ha Ombudsman, an refferal ngan mga dokumento nga kalakip hini in igpapailarom ha inisyal nga ebalwasyon agud madetermina an aksyon nga naangay buhaton.
Kaupod na dinhi an pagdudumara hin kadugngan pa nga imbestigasyon kun kinahanglan nga nasusubay ha aludayday han balaod.
Makakasigurado naman daw an publiko nga an nasabi nga istoryahon in ira kakaptan hin waray gin-uugupan nga kolor ha pulitika.
Manunumduman nga ha refferal nga iginsumite han NBI ha Ombudmsn in nag-ugat ini ha nadiskubrehan nga ‘discrepancies’ daw han mga propyedad nga nakadeklara ha SALN ni Vice President Duterte.
Sanglit mahuman an imbestigasyon han buhatan, ira na ini iginpasa ha Tanodbayan agud makit-an an pagkakaiba ha igindeklara nga kantidad han ‘properties’ kumpara ha aktwal nga ‘assessed value’ han mga ini.
