TACLOBAN CITY – Kasumpay ha pagsasalin-urog han Women’s Month yana nga bulan hiton Marso, in magkakamay-ada hin Violence Against Women and Chidren information drive an mga otoridad han Tacloban City Police Office kun diin, kakadtuon han mga otoridad an mga mulupyo han usa nga barangay agud pasabuton han mga katungod hini ha kumunidad.
Sumala kan Tacloban City Police Office, Public Information Officer PLT Evalyn Lei Diaz, kaupod nga ig papasabot han mga ini an bago nga balaod nga Safe Spaces Act Information Drive ha ilarom han RA 11313 o an act defining gender-based sexual harrassment in Streets and Public Spaces, Online, Workplace and Educational Training Institutions kun diin, naghahatag ini hin mas hitaas nga proteksyon ha mga biktima han sexual harrasment sugad han pangaham ngan iba pa ug man maghahatag ini hin penalidad ha mga suspek nga magbubuhat hin diri maupay nga butang ha mga kababayen-an.
Dugang pa hini, magkakamay-ada gihapon hin aktibidad nga bisita pangumusta kun diin, bibisitahon han mga otoridad an mga na biktima han abuse nga gin kaptan han mga kapulisan.
Pahinumdom gihapon ni Diaz ha mga kababayen-an, BABAYE KA, DIRI BABAYE LA.
