NATIONAL NEWS– Pagdudumaraon an Rite of Sealing ha lungon hiton tumalikod na ha kadayunan nga lider han Simbahang Katolika nga hi Pope Francis niyan hiton alas-8:00 han bag-i, oras ha Vatican, ngan alas 2:00 naman hiton ka-agahon dinhi ha aton Abril 26, Sabado, oras ha Pilipinas.
Pagdudumaraon ine ha liturgical rite nga papangunahan hiton Camerlengo han Holy Roman Catholic Church nga hi Cardinal Kevin Farrell ha St. Peter’s Basilica kun diin nakahay-ad an patay nga lawas ni Pope Francis.
Aatinderan naman ine han pira nga mga Cardinals ngan mga opisyal han Holy See.
Ginhahngyo naman han Office for the Liturgical Celebrations an presensiya nira Cardinals Giovanni Battista Re, Pietro Parolin, Roger Mahony, Domenique Mamberti, Mauro Gambetti, Baldassare Reina, ngan Konrad Krajewski ha pagdudumaraon nga Rite of Sealing ha lungon ni Pope Francis.
Kalakip naman ha mga ma-asister ha nasabi nga seremonya hira Archbishop Edgar Peña Parra, Archbishop Ilson de Jesus Montanari, Monsignor Leonardo Sapienza, Canons of the Vatican Chapter, Ordinary Minor Penitentiaries of the Vatican, an secretaries ni Pope Francis, ngan iba pa nga in-admit han Master of Pontifical Liturgical Celebrations nga Archbishop Diego Ravelli.
An nasabi nga liturgical rite naman an marka han paghuhuman han public viewing ha St. Peter’s Basilica, kun diin sobra 90,000 katawo an naghatag hin pagkilala ha urhi nga panahon han Santo Papa.
Samtang, pagdudumaraon naman an funeral mass , buwas nga adlaw Sabado alas 10:00 hiton aga ha St. Peter’s Square o alas-4:00 hiton kulop, oras ha Pilipinas.
