Ginbabana-bana nga maabot ha 5.7 metriko tonelada an aangkaton nga bugas han Pilipinas yana nga tuig, subay ha US Department of Agriculture (USDA).
Mas hitaas ini hin 100,000 metric tons kumpara ha nauna nga target han ahensya ngan sobra gihapon ha 4.8 milyon metric tons nga projection han Department of Agriculture. Tikang han Enero kutob Hunyo 11, nakag-angkat na an nasud hin 2.42 milyon metriko tonelada hin bugas.
Ginpahitas-an han USDA an ira forecast mahitungod nga ginlalauman nga maubos an lokal nga produksyon han humay. Kaupod ha mga rason an padayon nga paghitaas han presyo han farm inputs sugad han abono, mas hamubo nga intensyon han mga parag-uma nga magtanom, ngan pag-ubos han lebel han tubig ha mga pangunahon nga dam nga ginagamit ha irigasyon.
Subay USDA, ginlalauman nga maabot la ha 12.3 milyon MT an milled rice production han nasud yana nga tuig, mas hamubo kumpara ha nauna nga bana-bana nga 12-4 milyon MT. Dako an nagin epekto han sobra 55% nga paghitaas han global price han urea fertilizers tikang pa dida han Marso, nga nagpa-ubos ha kuhida han mga parag-uma ngan nagpapahinay ha ira kapas nga pahaluagon an pagtatanom.
Dugang pa hini, nagpahimatngon an Department of Agriculture nga posible maibanan hin kutob 700,000 metriko tonelada an produksyon han bugas kun magkamay-ada hin duro nga El Niño.
Subay naman ha state weather bureau, posible maeksperyensyahan han nasud an mahinay ngada ha makusog nga El Niño pag-abot han katapusan nga parte han tuig kutob ha syahan nga parte han 2027, nga posible magdurot hin makusog nga katmara ngan makaapekto ha produksyon han agrikultura.
