NATIONAL – Dire dapat ig konsidera han prosekusyon nga patibong o trap an gin aaro ha ira nga ikaduha nga sertipikasyon han Senate impeachment court kun karuyag nga igpadayon han 20th Congress an impeachment trial kontra kan Vice President Sara Duterte.
Baton ine ni Senate impeachment court Spokesperson Atty. Regie Tongol mahuman nga igpahayag ni Akbayan Representative Chel Diokno ng kinahanglan maghirot han Kamara ha gin aaro nga sertipikasyon kun karuyag la gihapon nga igduso an pagdungog kontra ha bise presidente.
Sumala kan Diokno, pwede magin parte han prosecution team nga—sakto na nga pruweba an eleksyon han prosecutors ha pag-aabri han 20th Congress ha July 28 nga committed hira nga igpadayon an pagdungon kontra kan VP Sara.
Baton ni Tongol, an gin aaro nga sertipikasyon ha ira han impeachment court in kaparte han paningkamot nga siguraduhon nga lehitimo an proseso ngan pagsunod han standard han Konstitusyon.
Igkonsidera daw unta ine nga importante nga parte han proseso agud malikayan an anuman nga komplikasyon nga pwede magpahinay ha impeachment process kun in magtikang na nga rumolyo.
Panuyo daw gihapon han gin aaro nga sertipikasyon nga mapabilin an integridad han naghuhulat nga pagdungog.
Ha katapusan, nagpahinumdom an tagapagyakan nga an pagbabaliwaray o pagprubar nga pahinayon an proseso han Impeachment Court in hulga ha kredibilidad han Korte, nga posible nga makaguba ha pagtapod han publiko ha bug-os nga proseso.
