Target han Department of Education (DepEd) nga matagan hin promosyon an ada ha 100,000 nga magturutdo ngan school heads ugsa mahuman an presente nga tuig, kumo kaparte han mas ginpahaluag nga suporta ngan reporma para ha sektor han edukasyon ha nasud.
Iginpahayag ini han buhatan kadungan han paghuhuman han School Year 2025-2026, ngan ha opisyal nga pagtitikang han usa kabulan nga bakasyon han mga magturutdo dida han Abril 1.
Subay ha DepEd, an nasabi nga target in matutuman ha ilarom han Expanded Career Progression System, nga panuyo maghatag hin mas klaro ngan malaksi nga proseso han promosyon para ha mga magturutdo.
An pitad in resulta han serye han nasyunal nga konsultasyon ngan pagbisita ha mga iskuylahan.
Labot ha promosyon, ginsigurado gihapon han ahensya an pagpapagaan ha pas-anon han mga magturutdo ha klasrum. Kalakip ha mga reporma nga iginpatuman di pala maiha imn an pagrebisa ha aludayday para ha classroom observation, panhatag han overtime ngan overload pay, ngan an pag-iiban ha administrative workload.
Padayon gihapon an distribusyon han gobyerno han mga laptop ngan iba pa nga learning reosources.
Gin dayaw ni Education Secretary Sonny Angara an sakripisyo han mga magturutdo ha padayon nga paghulma ha mga kabataan ha kaluyo han mgh ayat ha sektor.
Samtang, iginkokonsidera gihapon han DepEd nga pamatuod han nahitaas nga kalidad han edukasyon an mga natatangi nga kalangpusan han mga istudyante yana nga tuig.
